Buangan

BUANGAN

Dening : Airlangga Wisnu Murti (1) lan Edi Prasetyo (7) / XII IPS 2

Jenengku Luffy utawa luwih lengkape Alexander Luffy Anggara . Aku salah sijine siswa ning SMA Indahraya , salah siji SMA swasta ing kuthaku sing luwih apik tinimbang SMA liyane ,   lan manggon ana kelas XII F , kelas sing muride paling gak diakoni ning sekolahanku alias dianggep kelas buangan . Kelas iki diarani buangan merga murid – muride rata – rata anake wong ora duwe lan dianggep bodho kaya kebo . Tapi , ora mesti sing dikira buangan iku ora bisa dadi apa – apa . Iki sapenggale crita ngenani kelasku .

Kelas XII F . Mari krungu jenenge kelasku , meski sing ngrungokake jelas ngguyu sajak ngece , “ He , cah buwakan! Kowe lapo ana kene?! Elingo , awakmu iku murid kelas buangan . Dadi ora usah gembul karo kene iki” . Saben krungu iku mau atiku langsung panas lan pengen njotos lambe sumur iku mau . Tapi , apa posisiku neng kene ? Aku iki mung anake satpam bank biasa sing isa sekolah kene merga beasiswa miskin saka panggonane bapakku kerja . Aku ora isa ngelawan begundal – begundal sing manggon ana kelas liya , apa maneh kelas XII A sing luwih dhuwur derajate tinimbang kelasku , sing saben dina ngreceki  lan nguras sangune kanca – kancaku . Aku iki mung kelas XII F , ora duwe daya kanggo ngelawan , protes , utawa nglaporna iku mau nang pihak sekolahan . Tapi , aku lan kanca – kancaku mung isa sabar lan pasrah . Ora ana gunane ngelawan begundal – begundal kelas XII liyane sing rata – rata anake pengusaha terkenal lan pejabat sing mungkin bandha donyane asale saka korupsi dhuwite rakyat .

Tapi , eling – elingen omonganku siji iki : AJA TAU NGEREMEHNA KELASKU . Ya , eling – elingen omongan iku mau . Merga apa ? Merga saktemene , aku lan kanca – kancaku iku luwih pinter lan apik tindak tandhuke tinimbang kelas liyane , apa maneh kelas XII A . Aku nguwasani 2 basa , yaiku basa Inggris lan basa Jepang . Meski basa Jepangku rada pedhot – pedhot , tapi iku isih luwih apik tinimbang bocah ing kelas liyane sing rata – rata ora tau isa ngalahna biji ulangan basa Jepangku lan kanca – kancaku . Sakliyane aku , kanca – kancaku rata – rata kapinteran luwih dhuwur tinimban bocah kelas XII A . Ana Nami , anake tukang kayu sing ahli ana bidang geografi , apa maneh geografi kelautan , lan tau oleh juara 1 Olimpiade Kelautan tingkat provinsi sing dieloki lewat jalur mandiri , terus ana Niko , anake guru SD honorer sing tau dadi juara 2 Olimpiade Sejarah tingkat nasional ing Batavia , lan sapanunggalane . Sakliyane prestasi , akhlak lan tindak tandhuke kelasku , mungkin luwih apik tinimbang kelas XII A . Meski anake wong mlarat , tapi aku lan kanca – kancaku ora tau nglakoni apa – apa kaya nyolong , tawuran , mendem , dugem , seks bebas , narkoba , lan sakliya – liyane . Malahan sing biasane kena kasus iku mau mesti kelas sing luwih dhuwur tingkate . Tuladhane , kaya kasus sing ngeneki bocah jenenge Raymond saka kelas XII A sing wong tuwane pengusaha properti paling sugih sak kuthaku iku tau nglakokake bisnis narkoba antar sekolahan , utawa Alex saka kelas XII B sing tau kena kasus tabrak lari nganti korbane tilar donya lan tau ngancem keluargane korban ben ora nglaporna awake nang polisi . Tapi , pihak sekolahan nyoba nutup – nutupi kasus – kasus iku mau lan ora menehi sanksi sing tegas marang bocah sing tau kena kasus . Dadi , ora mesti apa sing diarani kelas buangan iku muride tingkah polahe kaya setan lan bodho kaya kebo , lan ora mesti apa sing diarani kelas unggulan utawa elit iku muride tingkah polahe suci kaya pandhita . Meski mlarat , kene isih nduwe akal kanggo mbedakna endi sing elek lan sing becik .